Feb 7,2010

Hargeysa (Warsanmag) — Warbixin kooban oo lagu daabacay websiteka ERIS shirkaddii Ingiriiska ahayd ee deeq bixiyaashu u xuleen inay kala shaandheeyaan macluumaadka diiwaangelinta codbixiyaasha JSL iyo in ay cayimaan wakhtiga doorashadu dhici karto, iyaga oo ka duulaya ARRIMAHA FARSAMADA oo keliya oo aan dhinaca siyaasadda la raacin ayaa si cad u tilmaamaysa in la filayo in doorashadu dhacdo sanadka aakhirkiisa.

Shirkadaa Ingiriska ee ERIS waxay ku faafisay website-keeda inay arrintii ay u xilsaarnaayeen ee ahayd sifaynta macluumaadka codbixiyaasha ay hore afar khabir u soo direen Somaliland kuwaas oo kale ahaa, kuwa ku xeel dheer maamulka doorashooyinka, farsamada diiwaangelinta, dhinaca nabadgelyada (security and logistics), iyo tababarada maamulayaasha doorashooyinka.

Waxa kale oo lagu sheegay inay kooxdaasi soo gebegebeeyeen hawshaa una gudbiyeen Komishanka Qaranka ee Doorashooyinka (KQD) talooyinkii ku saabsanaa sida loo geli karayo kala sifaynta macluumaadka diiwaangelinta iyo wakhtiga ay qaadan karto hawshaas iyo kuwa kale ee hadhay. Waxa kale oo lagu sheegay inay ERIS ay bixisay tababar KQD oo ay kala qaybqaateen hay’addo kale oo khibrad ku leh amoorahaas.

Ugu dambayn macluumaadka website-ka ku yaala waxay ERIS ku faafisay shaqaale raadis khubaro la shaqeeya KQD oo ay yidhaadeen waxay kala shaqayn doonaan KQD u diyaargarowga doorashooyinka la filayo inay dhacaan SANADKA AAKHIRKIISA.

Intaa kor ku qoran Waaheen waxay ka soo xigatay website-ka ERIS..waxbana kamaanu tegin waxbana kumaano darin.

Hadaba hadii ay dhabtahay in ERIS ay talooyin iyo jadwal u gudbisay KDQ, ma soogaadhay jadwalkaasi asxaabta qaranka ee iyagu ku tartamaya. Waxaanu isku daynay inaanu wax ka weydiino madaxda asxaabta qaar ka mid ah…khaas ahaan UCID iyo KULMIYE labada kooxoodna waxay noogu jawaabeen inay iyagu u haystaan in arrimahaas oo dhan la dhameeyey doorashaduna aanay bil ilaa laba bilood dib uga dhaceyn. Mar shalay Hadhwanaagnews waraystay Guddoomiyaha UCID, Faysal Cali Waraabe, wuxuu isna sheegay inay gaabis jiro xagga farsamada laakiin uu imika filayo inay doorashadu dacdo April ama horaanta May.

Source: Waheeen