Feb 02,2010

"Saleebaanoow ma waxaan ku mooday,mise waxaad noqotay,mise waxaan loo noqon doonin. Waxaan ku mooday Libaax, waxaad noqotay Kurtin,….Guurtida umaad wadin siday kugu waday, waxaanu kaa codsanaynaa inaad Guurtida Iimansataa ood Kursiga kale aanad doonin,waa inaad Golaha qabyaalada ka bi’isaa,ood walaaqa ka daysaa” X Cabdi Waraabe

“Weerar weeyi, Weerar weeyi waxay ku eekayd intii hore inaad ku daysaan Kamaan filayn Xaajiga saaka erayadan !!!, arrinta haday saddexdayda ku kooban tahay xal loo waayi maayo” Saleebaan Gaal

Hargeysa (Warsanmag) Xaaji Cabdi Waraabe oo ah Odayga ugu Da’da weyn Golaha ayaa fadhigii shalay ku eedeeyay Saleebaan Maxamuud Aadan Guddoomiyaha Golaha Guurtiddu inuu ka masuul yahay waxa Golaha ka dhacaya waxaanu yidhi “Shir-Gudoonku waa mahadsanyahay, Sharafkaa aad soo jeediseen ee Guurtidu isku raacday ee maanta. Waxa qaloocu ka socdaa Golaha waa Shir-Gudoonka. Gacantu haday ku Xanuunto Laabtaa lagu qabtaa, Lugtu haday ku xanuuntana waa la dhutiyaa oo ul baa la qaataa, Calooshu haday ku xanuuntana maraa lagu xidhaa, Madaxu haduu ku xanuuno lama socon karo, Saddexdiina Shir-Gudoonka ahi qawl aad u dhantihiin Goluhu idinku diidi maayo, aarinka waad seegteen maaha kolay Binu’aadam baynu nahayoo waa la seegayaa oo meel baa laga dhacayaa, kolna waa la Asiibayaa, hadaad sadexdiinu mid noqotaan waxba inaga xumaan mayaan Goluhuna waa idin aqbalayaa. Golaha Ragii waa waynaa badanaa ha dhintaba’e Rag dhalinyaro ah oo wanagsan baa fadhiya, Golaha Cudurka galaa Shir-Gudoonkuu ka kacaa.

Marka hore waxa la yidhi Nina wuu u gar xun yahay, Nina waa u dirir xun yahay Raga, Nin waa u dirir xun yahayoo Laba Ilmaadeera oo is dhirbaaxay oo is uleeyay oo mid la lagday, Kolkuu ka kacayo ee laga kicinayo gacmahaa la qabtaa ee uu sii haraatiyo Kaba Jaangariya iyo Xoog baa la lahaa, ama maskaxdayba haraatidaasi gaadhaa amaba rubadkayba ku dhacdaa Ninkaasi wuu u dirir xun yahay baa la yidhaa. Nina waa u Gar xun yahayoo Laba Nin oo is haya oo isula yimid labadiinuba garbaad leedihiin Ninkaasina wuu u gar xun yahay.

Gudoomiyaha Saleebaan ma waxaan ku mooday, waxaad noqotay, waxaan loo noqon doonin. Waxaan ku mooday Libaax, waxaad noqotay Kurtin, waxaan loo noqon doonin Guuro-gal Habeenimo. Maanta Mutacalim iyo Oday baad tahay sidaa maanta sheekha loogu codeeyay, Codkiisa 63 ka Ninba way isku raaceen, sidaan kuugu caano lisay iigumaad hanbayn buu yidhi, Guurtida umaad wadin siday kugu waday, waxaanu kaa codsanaynaa inaad Guurtida iimansataa ood Kursiga kale aanad doonin, ood Kursigan ama Geeri kaga tagtaa ama Sharaf kaga tagtaa ood Guurtida midaysaa, ood Somalida Dhaqaalaysa, oonad dan aad leedahay oo qudha aanad eegin oo meel aanad tiigsane Jamhuuriyadu dushaaday saarantahay Guurtidana adigaa u wada Aabo ah inaad Dadaashaa oo midaysaa ood qabyaalada ka bi’isaa,ood walaaqa ka daysaa baanu kaa codsanaynaa”

Dhinaca kalena waxa hadalka Cabdi Waraabe si cadho leh uga jawaabay Saleebaan Maxamud Aadan waxaanu kaga jawaabay “Weerar weeyi, Weerar weeyi waxay ku eekayd intii hore inaad ku daysaan Kamaan filayn Xaajiga saaka goobtan aynu joogno erayadan, waxaan ka filaayay kii ururiya haday Golaha sidaa aad sheegteen run ka sheegteen oo ay saddexdayda nagu kooban tahay xal loo waayi maayo, Illahay ha ka dhigo inay saddexdayda nagu koobnaato, sidaa xaajigu u yidhina maaha, waxaan is lahaa Xaajiga Xilkuunbaan kaga waynaaye, Da’ iyo waayo aragnimo inuu isagu igaga horeeyaabaan moodayay, gidigeenba aynu Golaha ururino, macaa Xubin Sharafyadii way fadhiyaan, Xaajiga waxaan kaga baxayaa waar Dalkaba maan joogin markay dhacday, markay idinka qaraxday Gootaba maan joogin, Sideed Kun oo Kilomitir baan joogay……Waar hadalka joojiya markii hore ayaad Xaajiga qaban lahaydeene

Golahana waxaan leeyahay Bil buu hada Goluhu xidhnaa yuu dib u xidhmin, Xilkeenana aynu gudano, Khilaafkuna kan ha ka baxo