Jan 16,2009
BurcoWarsanmag). Taliyihii hawl-gelinta ciidanka booliska ee gobolka Sool,ayaa fiidnimadii caawa koox hubaysani Toogasho ku dileen gudaha magaalada Laas-caanood.

Taliyahan la dilay oo lagu magacaabi jiray marxuum Cismaan Faarax Maxamud,ayaa la dilay ka dib markii koox hubaysani ay u galeen goob u dhow xaafaddiisa,halkaana ku dileen isagoo xilligaas ka soo baxay masaajid uu ku soo tukaday salaaddii cishaha.

Dilka sarkaalkan booliska ah oo ay xaqiijiyeen masuuliyiinta gobolka Sool,ayaan illaa hadda la garanayn cidda dilkaas gaysatay iyo sababta loo dilay toona,hase yeeshii wuxuu sarkaalkani noqonayaa sarkaalkii labaad ee ka tirsan ciidammada Somaliland ee lagu dilo Magaalada Laas-caanood gudaheeda.

Todobaadkii hore ayey ahayd markii qarax keenay dhaawac lala beegsaday saldhigga booliska ee magaalada Laas-caanood,hase yeeshee, waxaa muddooyinkan dambe isasoo taraya ama soo kordhayey falalka noocan oo kale ah,kuwaasoo illaa hadda aanay jirin cid loo qabtay,balse u muuqda kuwo lagu khalkhal galinayo xasilloonida,iyo degganaanshaha ka jirta magaalada Laas-caanood ama guud ahaanba gobolka Sool

TogdheerNews..Burco.